Himinn og jörð... og allt þar á milli!

Sprellmót!:D

Mon, 06 Oct 2008 12:44:41 GMT

Halló..

Um helgina var sprellmót í Háskólanum, sem var BARA gaman!!:haha: Allar deildirnar hafa ákveðið þema og við í heilbrigðisdeildinni vorum bóndadurgar! Þarf ekki að segja neinum að ég fann mig í því hlutverki! hehe.. Ég tók m.a. þátt í reipitogi og söngvakeppni! Við Lára sungum "Ég og heilinn minn!" með stæl! Held að þessar myndir segi meira en mörg orð.. hehe..

Á leiðinni í bæinn..

BÓÓÓNNDDDIII!!

Meiri hlutinn af bekknum mínum..

Næstu Eurovision farar???

Vala, ég og Erna.. bara sætastar..

Jæja.. er í tíma og verð að taka eftir.. Þeir sem eru með facebook (já, ég lét gabbast!) geta skoðað fleiri myndir. Það er allt að verða crazy þar!;)

Kv. Ásta Margrét

P.s. comment, comment, comment....

Helgin í hnotuskurn

Mon, 29 Sep 2008 11:38:38 GMT

Jæja..

Þá er helgin afstaðin. Var mjaltakona, ljósmóðir, kennari og bílstjóri með meiru um helgina. Var sem sagt í sveitinni að mjólka, tók á móti risastórum kálfi, hjálpaði systrum mínum með heimalærdóminn og skutlaði liðinu hingað og þangað um sveitina!:) Andrea vinkona mín kíkti svo í heimsókn um helgina. Alltaf gaman að hitta þann fjörkálf!;) Hlógum okkur m.a. máttlausar yfir Búkollu. Vorum að bera saman gömlu og nýju bókina. Mjög skemmtileg afþreying. Svei mér þá ef fólk hefur ekki yngst síðan í gömlu bókinni, tískan var náttúrlega bara yndisleg! Haha..

Annars mest lítið að frétta. Alltaf það sama bara.. skóli, þvo þvott, vinna, þrífa, læra, tala í símann, elda, ræktin... Hey, já! Haldiði að ég sé ekki bara búin að kaupa mér árskort í Átak!!! Markmið mitt og Guðrúnar, vinkonu minnar, er að verða ógeðslega flottar fyrir jólin! DUGNAÐUR!;)

Næstu helgi er svo sprellmót í Háskólanum. Reikna því með skrautlegri og skemmtilegri helgi!;) Aldrei að vita nema ég hendi inn einhverjum myndum ef ég fæst til að taka einhverjar! Hehe..

En má því miður ekki vera að þessu... Látið endilega vita af ykkur sem fylgist með!;)

Kv. Ásta

Sumarið er tíminn..

Mon, 22 Sep 2008 11:46:26 GMT

Halló, halló..

Jæja, þá er sumarið búið og ef til vill kominn tími á blogg. Veit ekki hvað það er, en það einhvern veginn slokknar bara á blogg löngun minni á sumrin. Nenni þá hvorki að blogga, né lesa blogg hjá öðrum og er bara ekki alveg að ná mér upp úr þessu!;)

Hvað um það.. ég er búin að bralla ýmislegt skemmtilegt í sumar. Ég er búin að hjóla talsvert mikið (á mótorhjólinu mínu) og fór t.d. í frábæra kvenna ferð um þar síðustu helgi. Getið kíkt á www.mxtedda.blogcentral.is til að sjá myndir og smá ferðasögu!:)

Í sumar vann ég í Árholti, sem er dagvistun fyrir fjölfötluð börn og þótti mér það mjög gaman. Ég fór líka í tvær útilegur, nokkrar ferðir suður til að fylgja litlu systur á motocross keppnir og fleira sem ég er búin að gleyma!:) hehe.. Allavega er þetta bara örsutt yfirlit yfir sumarið, bara svona til að koma mér í gang..

Um síðustu helgi var ég í sveitasælunni að mjólka blessaðar kusurnar. Gaman að segja frá því að þegar við Andrea mættum í fjósið á laugardagsmorguninn klukkan 6, þá mættu okkur ÁTTA naut af stærri gerðinni. Þau höfðu sloppið út úr stíunni sinni og maður getur ímyndað sér að það hafi verið fjör hjá kúnum þá nóttina!;) hehe.. nei, reyndar eru blessuð nautin svo vitlaus að þau náðu ekki einu sinni að brjótast inn til skvísanna, heldur lágu þeir á víð og dreif á göngunum umhverfis. Ég fraus bara í stiganum og langaði ekkert sérstaklega til að takast á við þessa tudda. Hringdi svo í neyðarnúmerið mitt “Jói Gsm” og fékk hann í lið með okkur!;) Næsti klukkutími fór svo í slagsmál, þar sem ég var vopnuð skóflu og Jóhann með klaufhamar í hendi. Hehe.. lífgaði heldur betur upp á morguninn.

En jæja.. má því miður ekki vera að þessu í bili. Vona bara að einhver eigi eftir að taka eftir nýju færslunni. Verðið að kommenta þið sem eruð svo eftirtektasöm! Hehe..

Kv. Ásta

Allt í stíl!:)

Mon, 09 Jun 2008 17:31:25 GMT

Halló, halló...

Má til með að monta mig smá! Ég er nefnilega búin að kaupa mér MÓTORHJÓL!!:haha: Gæti ég verið meira í stíl?;)

Annars er það helsta að frétta að ég er byrjuð að vinna á fullu og svo skrapp ég suður um síðustu helgi þar sem Ásdís var að keppa á mótorhjóli og stóð sig með glæsibrag. Næstu helgi fæ ég svo nokkrar þokkadísir að sunnan í heimsókn og hlakka ég mikið til!:)

En nóg í bili.. kommentið endilega og segið mér hvað ykkur finnst um nýja gripinn minn!;)

Kv. Ásta

Mótorhjól

Wed, 21 May 2008 23:30:11 GMT

Halló, halló..

Langaði bara að deila með ykkur hvað mig langar mikið að fá mér mótorhjól! Ég er nú reyndar engin afburða hjólakona ennþá, en þetta er samt svo gaman!:haha: Ég fór með Múla liðinu í brautina á Sauðárkrók um þar síðustu helgi og svei mér þá ef ég hélt ekki að það yrði mitt síðasta! haha.. Ég fór einn hring (mér tókst það þó nokkuð áfalla laust) og hef sjaldan verið jafn hrædd! Ég er algjör kjúklingur! hehe.. En æfingin skapar víst meistarann!:)

Um síðustu helgi skellti ég mér svo á Pál Óskar með hóp af fallegum, dansglöðum yngismeyjum. Alltaf gaman á Páli Óskari.. eða allavega lang oftast!;) Skelli inn myndum af því næst..

Nenni ekki meiru í bili..
Kv. Ásta

Próflokadjamm

Wed, 14 May 2008 10:55:50 GMT

Halló, halló....

Á föstudaginn var fagnað prófalokum. Við bekkurinn fórum út að borða á Staðnum, hittumst svo heima hjá mér og svo lá leiðin á Kaffi Ak þar sem dansað var botninn úr skónum...

Fagrar blómarósir í gírnum! Eins og kannski má sjá þá var sólgleraugna og hatta þema!;)

Bara cool...

Farið var í drykkjuleik til að hressa liðið við. Að sjálfsögðu var aðeins drukkið vatn, malt, pilsner og fleiri þess konar orkudrykki..

Þið getið skoðað fleiri myndir inn á:

www.picturetrail.com/astan4

Alveg klárt að við þurfum að endurtaka þetta iðjulufsurnar mínar!;) A.m.k. skemmti ég mér konunglega..

En jæja! Má því miður ekki vera að þessu.. Þarf að fara út og finna afmælisgjafir handa Thelmu litlu systur minni sem á afmæli í dag og ástkærum Jóhanni mínum, sem á afmæli á morgun! TIL HAMINGJU MEÐ AFMÆLIN, bæði tvö!:haha:

P.s. ...allar hugmyndir vel þegnar!;)

Kv. Ásta Margrét

BÚIN Í PRÓFUM!!!

Thu, 08 May 2008 20:58:18 GMT

HALLÓ!!:d

Jæja þá eru prófin loksins búin og lífið tekur við á nýjan leik!:haha: ..eða ég vona það allavega, verð að viðurkenna að ég er ekki alveg viss hvernig blessuð lífeðlisfræðin fór, en það kemur í ljós. Þessu er allavega lokið í bili!;) Hugsa sér fyrsta árinu í iðjuþjálfuninni lokið.. Mikið líður tíminn hratt! Á morgun verður svo dekurdagur dauðans, klippt flétturnar af leggjunum, spaslað yfir ljótuna, slett úr klaufunum og dansað fram á rauða nótt! Maður verður að nú að halda almennilega upp á þetta!;)

En jæja, ég ætla ekki að eyða öllu kvöldinu í að blogga. Hef marga þarfari hluti að gera eins og liggja uppi í sófa með tærnar upp í loftið, horfa á sjónvarpið og borða popp!;)

Bless í bili...
Ásta Margrét

Bilað blogg!

Wed, 23 Apr 2008 11:26:11 GMT

Sæl og blessuð!

Loksins er bloggið mitt komið í lag, en þá má ég bara því miður ekki vera að því að blogga! Það var einhver bilun í kerfinu og ég gat ekki skráð mig inn og sömuleiðis duttu út fullt af tenglum hjá mér, t.d. allar Hafrógellurnar, þannig að þið skuluð ekki misskilja þetta! Ég var ekki að eyða ykkur út!;) hehe.. Prófið nálgast á ógnarhraða, en það gerir sumarið líka!:) Get ekki beðið eftir að klára prófin og komast í sumarfrí!:)

En það hefur margt gerst sem ég varla nenni að telja allt upp.. við fórum til Las Vegas í mars, sem var geðveikt!! Þið sem eigið myspace getið skoðað myndir inni á myspace síðunni minni..

Jæja.. lærdómurinn bíður. Ég ætla að enda þetta á minningargrein sem ég skrifaði um elsku, besta afa minn, Snorra, sem dó 13. febrúar síðastliðinn og var mér svo kær.

Elsku afi Snorri.

Það er svo skrýtið að hugsa til þess að þú sért farinn frá okkur, eiginlega bara óraunverulegt og eitthvað svo fjarlægt. Ófáar minningarnar leita á hugann og ekki hægt að komast hjá brosi þó að sorgin sé mikil. Þú varst alltaf svo hress og kátur og gantaðist alveg fram á síðasta dag. Ég gleymi því aldrei hvernig þú gast leikið við okkur barnabörnin daginn út og daginn inn og virtist aldrei fá leið á látunum í okkur. Ég man hvernig þú dinglaðir plötunum á veggjunum fyrir okkur þegar við vorum ungabörn, hossaðir okkur á löppunum á þér og hvernig leikirnir urðu sífellt ærslafyllri eftir því sem við urðum eldri. Við skemmtum okkur mörgum stundum við að metast um hvort okkar væri nú betra í hinu og þessu, sem endaði oftast með harðri keppni, enda rek ég mitt gríðarlega keppnisskap beint til þín, afi minn. Ég veit ekki um marga afana sem hafa brugðið á leik og stokkið þrístökk í stofunni orðnir sjötugir að aldri. Þetta var um jól og við vorum að sjálfsögðu að keppa um hvort okkar stykki lengra og notuðum sokka til að merkja við. Þegar mér tókst að stökkva aðeins lengra en þér, þá ætlaðir þú aldeilis að taka á honum stóra þínum. Það endaði nú ekki betur en svo að þú stökkst beint á sokkinn minn, dast kylliflatur og rannst á fleygiferð undir jólatréið sem datt beint ofan á þig. Amma orgaði og skammaðist, dauðhrædd um að þú hefðir brotið þig, en þegar hún sá þig skellihlægjandi inn á milli greinanna með jólaskrautið flækt í hárinu, gat hún ekki annað en hlegið með. Alla tíð síðan höfum við hlegið að þessu uppátæki okkar og metist um hvort okkar hafi nú í raun unnið. Ætli ég verði ekki að játa mig sigraða í þessu, því önnur eins tilþrif hafa aldrei sést. Þetta er yndisleg minning sem ég mun ávallt geyma í hjarta mér. Meira að segja þegar ég heimsótti þig á spítalann þá slóstu á létta strengi og spurðir hvort við ættum ekki að skella okkur í þrístökk. Ég er alveg sannfærð um að við eigum eftir að keppa aftur einn daginn, afi minn.

Þegar ég bjó hjá ykkur meðan ég var í skólanum hélt metingurinn og keppnin áfram. Í þetta skiptið snerist það um að ljúka matnum og hver sá sem ekki gat lokið var að sjálfsögðu úr leik. Svo borðuðum við oftast yfir okkur af kræsingum og stóðum bæði á blístri. Gleðin skein alltaf af þér og smitaði alla sem í kringum þig voru. Þú varst dugnaðurinn upp málaður, sast aldrei aðgerðarlaus og gafst aldrei upp. Þú varst líka einn sá allra stríðnasti sem ég hef nokkurn tíma þekkt. Ég gleymi því ekki þegar þú fórst til tannlæknis til að láta draga úr þér tönn. Eftir að læknirinn hafði deyft þig brá hann sér frá, en á meðan tókst þér að losa tönnina og datt ekki í hug að segja lækninum frá því, heldur stakkst henni í vasann. Svo léstu sem ekkert væri þegar læknirinn kom aftur og kannaðist ekkert við að hafa misst tönnina. Ég man þú hlóst svo mikið þegar þú sagðir mér frá þessu að þú komst varla sögunni frá þér. Stríðnin kurraði í þér og þér þótti þetta svo skemmtilegt. Þú varst líka snillingur í stríða ömmu og gera hana alveg vitlausa. “Bölvaður bjáni geturðu verið”, sagði hún alltaf og hló þegar hún áttaði sig á því að þú varst að stríða henni. Þú varst svo skemmtilegur, einlægur og góður maður, afi minn. Þú kunnir ógrynni af allskonar vísum, þulum og gátum, sem þú skemmtir okkur hinum með. Þú talaðir líka alltaf við hrafnana, krúnkaðir út um hurðina á sólstofunni og alltaf svöruðu hrafnarnir. Þú kenndir okkur líka að veiða flugur af mikilli kænsku. Það verður erfitt að vera hérna án þín sem gerðir líf okkar svo litríkt, en sem betur fer eigum við allar góðu minningarnar um þig. Það verður skrýtið að koma í Goðabyggðina og hafa engan afa til að metast og keppa við, en ég veit nú samt að þú ert þar og fylgist með okkur. Ég mun aldrei gleyma þér, elsku besti afi minn. Megir þú hvíla í friði.

Þín Ásta Margrét

Tvítug í fjórða skiptið!!;)

Mon, 11 Feb 2008 23:44:18 GMT

Sæl og blessuð öll sömul!:)

Langaði bara að skjóta inn einni stuttri færslu og þakka öllum þeim sem sendu mér kveðju á fimmtudaginn síðasta þegar ég fagnaði tvítugs afmæli mínu í fjórða skiptið!;) hehe.. Það var ekkert smá gaman að sjá hve margir mundu eftir því.. meðan sumum, köllum hann bara "JÓHANN", tókst næstum því að gleyma því!;) hehe.. Honum tókst þó að klóra í bakkann með mjög svo fallegum módel-smíðuðum eyrnalokkum, ilmandi blómum og rómantískum kvöldverð á Bautanum!:) Hann kann þetta strákurinn!;) En sem sagt, til ykkar allra: Takk, takk, takk, takk...

Meira næst..

Kv. Ásta Margrét

Allt er hægt!

Thu, 31 Jan 2008 15:31:00 GMT

Halló, halló..

Ákvað að skrifa nokkrar línur..

Haldiði ekki að ástkær, ómissandi, elskuleg tölva mín hafi tekið upp á því að BILA!:( Þvílíkt neyðarástand! Hún sem alltaf hefur staðið sig eins og hetja, blessunin! Veit að Jóhann er klárlega ekki sammála því.. en það er ekkert sama hver á við litlu ljúfuna! Já, þessi garmur er svo sannarlega með sál, enda komin til ára sinna! Hehe.. Verst að hún bilaði einmitt þegar ég var að fara í próf og allar glósurnar mínar lokaðar inni! En það er gott að eiga góða að og má segja að Anna Karen (sem reddaði mér glósum) og Ágústa (sem lánaði mér tölvuna sína) hafi bjargað lífi mínu í þetta skiptið, takk fyrir það elskurnar mínar!:* En ég hlakka mikið til að fá litla hlunkinn minn aftur! Það verður sko ekki auðvelt að finna henni staðgengil þegar þar að kemur.. Svo er hún reyndar alls ekki biluð, þannig séð, heldur brotin!! Obbosí! Ekki benda á mig!;)

Næsta mál á dagskrá mun svo vera gífurlegt afrek Guðfinnu nú á dögum! Haldiði að stelpunni hafi ekki tekist að fá mig til að ganga í menningarheim MYSPACE!! Fuss og svei! Allt er hægt! Ég hef lengi haldið því fram og staðið við að fá mér ALDREI slíkt, enda vita lesendur þessarar síðu að ég á alveg nóg með mitt blogg! Hef því miður ekki tíma í svona vitleysu, en ég lét undan hvolpa augunum og 30 klukkutíma nuddi!;) hehe.. En aðeins með því skilyrði að hún byggi hana til og sæi um allt uppihald.. þannig að tæknilega séð er þetta algjörlega hennar síða! Híhí.. Ef þið hafið áhuga á að kíkja á afrakstur stúlkunnar þá er slóðin:

www.myspace.com/astamargret_

Getið líka fundið tengilinn hér til vinstri! ..og þið sem ég hef ekki enn addað, endilega addið mér, ef ykkur sýnist svo!:) Lítur svo vel út að eiga marga vini!;)

Svo er það langþráð næsta helgi.. ÞORRABLÓT!! Það á sko aldeilis að sletta úr klaufunum get ég sagt ykkur, dansa, drekka, borða og hlægja.. MIKIÐ! Gaman, gaman.. ;) En jæja.. nóg í bili!:) Veit að það nennir hvort eð er enginn að lesa langa pistla..

Comment, comment, comment...

Kv. Ásta Margrét

Fyrsta færsla ársins 2008..

Wed, 02 Jan 2008 22:05:32 GMT

GLEÐILEGT NÝTT ÁR!

Hvílíkt frí.. yndislegt að slaka á og gera nákvæmlega EKKI NEITT!:) Jólin hafa snúist um að borða, lesa, púsla, horfa á video og fleira í þeim dúr. Reyndar var talsverður þeytingur á okkur, sérstaklega yfir helstu jóladagana, þar sem við reyndum að vera á öllum stöðum í einu.. þ.e.a.s. bæði með minni fjölskyldu og Jóhanns. Engu að síður tókst mér heldur betur að slaka á, ef til vill um of! Við fengum margar og mjög svo fallegar gjafir, sem við erum ofsa ánægð með.. takk fyrir okkur!:)

Af mér er annars að frétta að prófin gengu vel og eftir þessa 3 vikna einangrun (..og skemmtilegt próflokadjamm!;)) hófst hinn ógurlegi jólaundirbúningur, sem endaði að sjálfsögðu á hlaupum.. fékk áfall þegar ég áttaði mig á hversu stuttur tími þetta var í raun og hversu rosalega mörg jólakort og gjafir við gæfum.. engu að síður tókst þetta allt saman á endanum með tiltölulega litlu stressi, fyrir utan jólabaksturinn! Ætlaði heldur betur að baka, en þar sem ég hefði hvort eð er þurft að taka afraksturinn með í sveitina, ákvað ég að njóta bara góðgætisins sem mamma hafði þegar bakað!;)

Ég brallaði svo ýmislegt mis gáfulegt í fríinu.. hitti gefass glamúrpíur í kokteilpartýi, málaði bæinn rauðan á annan í jólum með Andreu, Kötlu, glimmergellum og fleirum, fór í leikhús með Guðfinnu á Ökutíma, fór á skauta, svaf til 12:30 ÞRISVAR sinnum í röð (ekki alveg ég að sofa fram yfir hádegi.. en mikið var það gott!;) hehe..), las tvær bækur, skrapp nokkrum sinnum í fjós, fór í heimsóknir, safnaði í brennu (kom síðasta klukkutímann... þvílíkur dugnaðarforkur!), spilaði fram á rauða nýjársnótt...

Mikið sem ég er orðin löt við að skrifa á þetta blogg... það er alveg hræðilegt því þá er alltaf svo ógurlega margt sem þarf að segja frá.. er samt að hugsa um að láta þetta duga í bili.. þið látið mig vita ef ég er að gleyma einhverju!:) komment, komment, komment..

Takk og bæ..

Ásta Margrét

Próf, próf, próf..

Wed, 28 Nov 2007 00:31:06 GMT

Bara ein stutt..

Vikan einkenndist af lærdómi fyrir utan:

Fór á Hvanndalsbræður á fimmtudagskvöldið.. alltaf mikið fjör!
Kíkti á kaffihús með Guðrúnu á föstudagskvöldið.. gaman, gaman!
Amazing Finn´s Race á laugardaginn.. Ratleikur hjá Finn ehf, þ.e. þar sem Jóhann er að vinna. Það var reyndar BRJÁLAÐ GAMAN!! ..og að sjálfsögðu vann ÉG!! Verð að segja ykkur betur frá því seinna, þetta er alveg efni í heila færslu! Þetta var ROSALEGASTI, FLOTTASTI og án efa SKEMMTILEGASTI ratleikur sem ég hef farið í..
Árshátíð vélsleðamanna um kvöldið.. dansi, dansi!
Kíkti með mömmu og Ásdísi í búðir sunnudaginn.. jólagjöfin er ég og þú!

Má því miður ekki vera að því að blogga núna.. Byrja í prófum á mánudaginn, en þau standa yfir í 2 vikur! Mikið hlakka ég til að komast í JÓLAFRÍ!!

Sjáumst þá!:)

Kveðja Ásta Margét

Jólaspenningur, sveitin og táfýla..

Tue, 20 Nov 2007 15:46:15 GMT

Halló.. Prófin nálgast og ég get ekki beðið eftir að komast í jólafrí! Jólaspenningurinn er alveg að gera út af við mig þessa dagana. Þegar prófin eru búin verður sko jólatónlistin stillt í botn, bakaðar smákökur, þrifið og skreytt, borðaðar mandarínur, skrifuð jólakort, keyptar jólagjafir og ekkert stress!:) Hlakka ekkert smá til að gefa jólaundirbúningnum lausan tauminn..

Fórum í sveitina um helgina. Það var árshátíð hjá Andreu og Ásdísi í Hafralækjarskóla og ég lét mig að sjálfsögðu ekki vanta þar. Alltaf gaman að sjá litlu systurnar brillera á sviðinu, maður fyllist stolti og ekki laust við að tár bliki á hvarma. Á eftir var svo heil mikið dansi ball. Við mamma stóðum okkur afar vel í marseringunni og við Óli tókum góðan snúning, viðstöddum til mikillar skemmtunar. Við vorum nefnilega ekkert ofsalega fær, en mikið skemmtum við okkur vel! Við reyndum líka að sannfæra gesti og gangandi um að Stella, betur þekkt sem Stella Spiderman, væri barnið okkar en ekki Guðfinnu. Svei mér þá ef það gekk ekki bara ágætlega!;) hehe..

Á laugardaginn var svo farið í kaupstaðarferð í vægast sagt vondu veðri, stormi og beljanda, og heilsað upp á tengdó og ömmu Þóru og afa Hreiðar. Amma Þóra gaf mér þennan líka dýrinds kjól sem hún hafði átt og ofsalega fínt pils. Verð einhvern tímann að taka mynd af mér í kjólnum og sýna ykkur.. ég er algjör prinsessa í honum!;) Ég fékk líka svakalega fínt veski frá tengdó, en þau voru að koma frá London! ..Ohh.. mig langar til London..

Við heilaga hárþrenningin hittumst svo og snæddum saman kvöldverð í vikunni sem leið.. Farið var yfir helsta slúðrið í heiminum í dag og hlegið af Freyju uppistandara!:) Takk fyrir yndislegt kvöld, stelpurnar mínar..

Á sunnudaginn kom svo Dagrún í heimsókn til mín og gisti tvær nætur. Hún var með kynfræðslu fyrir Akureyringa, ekki veitir af að uppfræða unga fólkið.. Það var voða gaman að fá hana. Við borðuðum góðan mat, gerðum neglurnar á okkur geðveikt fínar, skoðuðum gamlar myndir og lágum í leti.. mikið er það nú alltaf gott!:)

Annars er ekki mikið fleira nýtt af nálinni. Ég fer alltaf í fótboltann á miðvikudögum með Guðfinnu, þar sem við keppum um, af miklum móði, hvor fái minni táfýlu og hvor sé meiri svampur! Maður á kannski ekki að segja frá því, en síðasta miðvikudag eyddum við talsverðum tíma eftir æfingu að þefa upp úr skónum hjá hvor annarri með tilheyrandi hlátrasköllum!! Guðfinna heldur því nefnilega fram að hún hafi aldrei “fengið” táfýlu, eins og þetta sé bara einhver flensa sem sé í gangi!! Einmitt, Guðfinna, einmitt! Það ætlar enginn að segja mér að allir “fái” ekki einhvern tímann táfýlu! Sveittir, blautir fætur lokaðir ofan í skóm í nokkra klukkutíma.. uppskrift sem allir hafa einhvern tímann bakað!! Ekki satt?;) hehe.. Það er mikið hlegið á miðvikudögum..

En jæja..

Bless og takk í dag.. Verið nú dugleg að kommenta..

Kv. Ásta Pjásta

Myndir

Sat, 03 Nov 2007 15:27:29 GMT

Jæja gott fólk! Fylltist svo miklum dugnaði eftir síðustu færlsu að ég ákvað að henda inn nokkrum nýjum myndum.. Þetta eru myndir úr afmæli Fanneyjar, myndir frá því þegar ég skrapp með Guffu og Stellu í Kjarnaskóg og nokkrar rosalega krúttlegar myndir af Stellu og Freyju. Njótið vel...

Borðið hreinlega svignaði undan kræsingunum.. mmmmmm...

Ester alltaf hress!:)

Guffa að róla sér..

Stella að ýta mér af stað..

Hún var pínu lúin eftir útiveruna og þá var sko gott að eiga Masa bangsa að..

Freyja og Stella, litlu sætu snúllur..

Og fleiri myndir á:

http://www.picturetrail.com/astan3

..eða einfaldlega í tenglinum hér til hliðar, undir myndasíður. En jæja.. nóg í bili.. Kíkið endilega á færsluna á undan líka.. Hún er tiltölulega ný og fullt af myndum þar líka.. Takk í bili!:)

Kveðja Ásta

Ertu skarpari en skólakrakki?

Fri, 19 Oct 2007 14:04:23 GMT

Haldiði að ég hafi ekki verið dugleg núna?
Setti inn myndir og kem mér í það loksins að blogga!
Þrefalf húrra og afturábak slipp og splatt...
Myndir, já hér koma þær.....

Skemmtilegar myndir frá Akureyrarvökunni (já! Það er langt síðan ég setti inn myndir síðast!;))..

Veit að þessi er óskýr, en mér fannst hún eitthvað svo lýsandi fyrir okkur, heilögu þrenningu hársins!;)

Látum okkur aldrei vanta á dansgófið..

Matti og Hemmi.. töffarar eða töffarar?;)

Svo eru nokkrar frá villibráðahlaðborði í Mývatnssveit þann 20. október!:) Þá átti Kjartan einmitt afmæli.. Skál fyrir því!

Og þetta var sko bestasta vinamerki í öllum heiminum, en það var samt ekkert rosalega þægilegt að gera þetta! En hvað gerir maður ekki fyrir vini sína?;)

Og svo eru margar fleiri sem þið verðið að skoða inn á:

http://www.picturetrail.com/astan2

...en til að vera alveg heiðarleg þá bloggaði ég þetta hér að ofan ekki einu sinni..Það er að segja byrjunina. Fékk Guffu mína til að gera það og setja inn myndir á picturetrail, en hún bara birti þetta aldrei! Ákvað að nota þetta svo færslan yrði lengri!;) hehe... Takk Guffa! Svona ykkur að segja þá hef ég, eins og þið hafið ef til vill áttað ykkur á staðið á haus undanfarna daga og mun halda því áfram og þess vegna ekki margra frétta að bíða frá mér á þessari síðu! Reyni að eyða tímanum frekar í að læra.. svona er að vera skólakrakki aftur!:$ En vona samt að þið lítið við annað slagið.. þið munuð líklega ekki missa mikið úr þó það líði langt á milli!:) híhí..

Bless í bili..
Ásta skólakrakki